月供計劃 - 中銀 VS 滙豐

近排都好多朋友問月供股票點樣入門，多數都係想知供邊隻股票好，個市唔好，唔敢亂入市，啲錢放起度唔知點好，自然就想月供股票希望入市，希望可以尋找機會又減低風險。反而無乜人問用邊間銀行／股票行做月供好，之前已經想打篇文講下邊度做月供股票好，不過個人懶，睇晒咁多銀行既計劃好花時間，最後不了了之。

今日有報導講銀行月供票計劃比併，就借個機會講少少。

【消委會】10銀行月供股票計劃比併　基本收費可相差逾倍

我做o靚仔既時候已經開始月供股票，本身滙豐有戶口所以就起滙豐做月供，當時供２６２８，＄５０００一個月，供供下無錢供，想停既時候發覺網上銀行跟本無得俾你停，一定要落分行攪，麻麻煩煩，之後轉咗去中銀再開始供。自己用開中銀係方便既，可以改月供金額，又可以隨時停，網上銀行攪掂晒，滙豐而家唔知有無咁方便。

留意其他收費

睇完ＨＫ０１報導，用滙豐而家唔收計劃收費好似好著數，滙豐只收一個月＄３０存倉，而家用中銀，一個月俾＄５０，一年就＄６００，但係唔洗俾存倉費，就咁睇滙豐的確有ＳＯ，但係有個好重要既收費—代收股息同代收紅股，滙豐係收０。５％，最低＄３０，即係話，起滙豐供越多唔同股票，代收股息費就越高。如果一年收少過６次股息，滙豐平過中銀，６次以上就中銀平。例如我個倉６隻股票一年收１５次息，就中銀平啲。又要留意返中銀如果有其他自己買既股票係要收返存倉費，每半年＄１５０。

中銀重有一樣最好就係可以用信用咭做月供儲分，開始計劃第一年比例５：１，第二年３：１，第三年１：１，最多一個月一萬分，即係第三年計，一個月供＄５０００，一年就有６００００分，２萬５一張＄１００　ＣＯＵＰＯＮ，　一年又平兩百。中銀沽碎股都係用正價，果度又多少少。